أمير عزمي مجاهد يهاجم إدارة الزمالك بسبب جروس – مصربوست

2025-02-17 23:35

كشف أمير عزمي مجاهد، المدرب العام السابق بنادي الزمالك، عن كواليس رحله السويسري كريستيان جروس عن القلعة البيضاء، وحقيقة إصابته بالزهايمر.

قال أمير عزمي مجاهد : “أتمنى من جمهور الزمالك يفرقوا ويعرفوا مين اللي بيحب الزمالك بجد، وفيه ناس كتير بتتزملك وهما مش بيحبوا نادي الزمالك، وأنا بحب الزمالك جدًا ومش بحب أعمل لقطات وأبوس قميص النادي”.

أكمل: “أنا كنت زعلان جدًا في الفترة الماضية بسبب العديد من الأمور خارج الملعب، وجروس كان يتعرض لكلام غير جيد، وحصل قلة أدب وناس مش متربية، واللي يشكك في صحة المدرب فهو قليل الأدب، واللي يقول جروس بينسى يبقى قليل الأدب، وكنت زعلان جدا”.

تابع: “يارب أكون عندي 70 سنة وأكون زي جروس، وهو فاكر كل حاجة، وفيه ناس لجان تابعة لنادي الزمالك هما السبب في معلومة زهايمر كريستيان جروس، وأي حد أتكلم على جروس بشكل خاطئ هما أغبية وكان فيه سكريبت، والبداية كانت بالزهايمر وبعد ذلك مش فاكر أسماء اللاعيبة”.

زاد: “في يوم من الأيام كل الناس دي هتتكشف وربنا مش بيضحك عليه، وعندي القدرة أني أتكلم عن ناس “أخليهم يقلعوا هدومهم” بس مش عاوز أذكر أسماء، وكان في شخص في الجهاز بيتكلم يتكلم مع مجلس الإدارة وجروس كان عارفهم، وجروس أكبر من كده”.

أردف: “جروس مدرب محترم، واشتغل لآخر يوم ليه مع الزمالك، وفيه ناس في مجلس الإدارة مش كانت عاوزاني في مجلس الإدارة لأني مش عصفورة، وجروس قرر تواجدي مع الزمالك ومجلس الإدارة كان يرفض تواجدي مع الفريق”.

أختتم: “علاقة جروس بلاعبي الزمالك السابقين كانت رائعة، والناس اللي بتقول أن التمرين في الفترة الأولى كان رائع وفي الفترة الحالية سيء، ودي طريقة بلدي، وجروس كان يريد التعاقد مع صفقات للفريق وجروس لم يفشل مع الزمالك نهائيا، وكان يطالب النادي بالصفقات”.